सुबिन विश्वकर्मा / बराहक्षेत्र
प्रधानमन्त्रि केपि शर्मा ओलि निकट नेपाल कम्युनिस्ट पार्टी (नेकपा) बराहक्षेत्रले आयोजना गरेको नगरस्तरीय अगुवा महिला भेला तथा नगरकमिटी गठन कार्यक्रमलाई मार्चण्ड समुहले अनाधिकृत भएको बताईएको छ ।
नेकपा बराहक्षेत्रका इन्चार्ज केशब प्रसाद तिम्सिनाले आफ्नो सामाजिक संजाल फेसबुकमा उक्त भेला आधिकारिक नभएको लेखेका छन् । यता पार्टी अध्यक्ष कमल बहादुर कट्वालले सदाबहार न्युजसँग कुरा गर्दै भनेका छन्, सोमबार भएको अगुवा महिला भेला तथा कमिटी गठनबारे इन्चार्ज केशब तिम्सिना, सहइन्चार्ज पुष्प ढुंगाना र पार्टी अध्यक्ष कमल कट्वाललाई जानकारी छैन् ।
सोमबार नेकपा बराहक्षेत्रका सचिव गजेन्द्र थापाको सभादक्ष्यता नगरस्तरीय महिला अगुवा भेला कार्यक्रम सम्पन्न भएको छ । भेलाले ८६ सदस्यीय महिला नगरकमिटी गठन समेत गरेको छ । कमिटीको संयोजकमा यसोदा खड्का र सचिवमा मनिदेबी राई रहेका छन् भने अन्य पदाधिकारीहरुको पहिलो बैठकबाट टुंगो लाग्ने सभादक्ष्य थापाले जानकारी दिए ।
बराहक्षेत्र ६ मा भएको कार्यक्रममा २ सय कार्यकर्ताको उपस्थिति थियो । जसअन्तर्गत बराहक्षेत्र नगरपालिका ३, ७, ८, ११ का वडा अध्यक्षहरु क्रमशः रुद्रबहादुर दाहाल, वीरबहादुर लिम्बू, फडिन्द्र भट्टराई र केदार बिस्टको उपस्थिति रहेको थियो ।
त्यस्तै, ओबिसी महासंघ केन्द्रिय सचिवालय सदस्य साजिद हुसेन, मदन भण्डारी फाउन्डेसनका अध्यक्ष बद्रीनाथ घिमिरे, बराहक्षेत्र नगरप्रमुख निलम खनाल, इटहरी उपमहानगरपालिका उपप्रमुख लक्ष्मी गौतम, धरानकि उपप्रमुख मन्जु भण्डारी लगायतका नेता तथा कार्यकर्ता उपस्थिति थिए ।
नवगठित कमिटीलाई केन्द्रिय सदस्य समेत रहेकी लक्ष्मी गौतमले सपथ ग्रहणसमेत गराएकी थिईन ।
