चक्रघट्टी इलाका प्रहरी कार्यालय चक्रघट्टीले जंगलबाट मारेर ल्याएको अबैध हरिणको मासु र तीन नाल भरुवा बन्दुक सहित बराहक्षेत्र नगरपालिका वार्ड न २ रेललाइनबाट दुई जनालाई पक्राउ गरेको छ । आज बिहानै जंगलबाट हरिण मारेर ल्याई घरमा काटिरहेको सूचनाकोआधारमा प्रहरीले अवैध हतियार तथा हरिणको मासु सहित दुई जनालाई पक्राउ गरेको हो ।
शुक्रबार बिहानै प्रहरीलाई जंगलबाट हरिण मारेर ल्याई घरमा काटिरहेको भन्ने सूचना प्राप्त हुनसाथ इलाका प्रहरी कार्यालय चक्रघट्टीका प्रमुख प्रहरी निरीक्षक पाण्डब राजवंशीको कमान्डमा खटिएको टोलीले बराहक्षेत्र २ रेललाइन स्थित निरज घिमिरेको घरमा काटेको हरिणको मासु १२ किलो, हरिणको सिङ, टाउको सहित घरमै लुकाइ राखेको ३ नाल भरुवा बन्दुक, बारुद १०० ग्राम र खुकुरी सहित सोहि स्थान बस्ने २५ बर्षका एसुब राना मगर र २५ बर्षिय सागर मगरलाई प्रहरीले नियन्त्रणमा लिई थप अनुसन्धान गरिरहेको प्रहरीले जनाएको छ ।
पक्राउ परेको हरिणको मासुलाई प्रहरी, ईलाका सब डिबिजन बन कार्यलय नडाहका कर्मचारी तथा पत्रकारहरुको उपस्थितिमा खाल्डो खनेर पुरेर नष्ट गरिएको छ।
